страницы А.Лебедева [pagez.ru]
Начало: Святоотеческое наследие

Протоиерей Георгий Спасский
Акафист Пресвятой Богородице, Светлой Обители странников бездомных

Приложение к статье игумена Ростислава (Колупаева) Протоиерей Георгий Спасский (1877-1943).

Кондак 1
Избранная от всех родов Дево, Мати Господа Бога Вышняго, в лучезарней славе небесней, превыше херувимов и серафимов сияющая, Царице и Владычице! Приклони ухо твое к нам грешным, утоли печаль сердец наших. Простри над нами покров Твой честный. Посети многобедственную жизнь нашу: в стране бо чуждей сущи, не имамы иныя помощи, не имамы иныя надежды, разве Тебе, Мати рода русскаго. Во страсе и трепете пред величеством милосердия Твоего, колена преклонше, ходатайства Твоего пред безсмертным Сыном Твоим просим, со умилением зовуще: Радуйся, Светлая Обителе странников бездомных.

Икос 1
Ангел благовестник с небесе послан бысть праведному Иоакиму, радость рождества Твоего возвестити, и возрадовася старец святый, величие Твое в мире божии провидя. Темже и мы с ним радостно Тебе, Богородоце вопием: Радуйся, Пречистая, всех цветовблагоуханнейшая: радуйся, Кроткая, милосердия двери нам отверзающая. Радуйся, Любвеобильная, над всеми нами покров Твой святый простирающая: радуйся, Дево Светозарная, наша терния опаляющая. Радуйся, Светлая Обителе, странников бездомных.

Кондак 2
Видяще Тя на облацех честный покров простирающу и тем нас соблюдающу, благодарственно вопием Ти: Аллилуиа.

Икос 2
Разум наш, обуреваемый помышленьми плотскими, вотще оковы земныя сокрушити тщится: немощни и лениви во гресех наших валяемся, но слезно к Твоему милосердию взываем: воздвигни из бездны греховныя, настави нас на путь спасения, да со ангелы Тебе, Матерь Пречистая, прославляем: Радуйся, покрове наш и наше спасение: радуйся, грешников негнушающаяся Молитвенница. Радуйся, наши слезы отирающая Утешительнице: радуйся, Мати Милосердия. Радуйся, живоприемный Источниче, нас напояющий: радуйся, во изгнании нас не оставляющая. Радуйся, Светлая Обителе, странников бездомных.

Кондак 3
Сила Вышняго охраняше Тя, егда младенческими стопами творила еси восхождение лествицы храма Господня. И мы, грешнии изгнанники отчизны нашея, емляся за святыя ризы Твоя, горестно молим: возведи нас по лествице спасения, да приблизимся к престолу славы Божией, благодарственно зовуще: Аллилуиа.

Икос 3
Имущи сердце, всех дев чистейшее, и разум в горняя устремленный, Ты, Дево Мариа, в храме Божии пребывающи, о земном не помышляя, все существо Свое к восприятию Царя Царей приуготовляла еси. Силы небесныя пред чистотою Твоею преклоняются, и весь род человеческий радостную песнь Тебе возсылает: Радуйся, Пречистая Дево, всех дев чистейшая: радуйся, разум плотским грехом не повредившая. Радуйся, Сердце, всех сердец Чистейшая: радуйся кроткая лампада всему миру сияющая. Радуйся, райское видение, наши духовныя очи умиляющая: радуйся, Красото неизреченная и неописуемая. Радуйся, Светлая Обителе, странников бездомных.

Кондак 4
Бурю отчаяния в сердцах наших претерпевая, во унынии и скорби жизнь изнанников во стране чуждей скончавая, к Тебе, Богородице, прибегаем и смиренно молим: подай нам силу духа, подай нам кротость и смирение к перенесению всех горестей наших, да вопием Богу: Аллилуиа.

Икос 4
Слышащи благую весть архангелом Гавриилом пренесенную, Ты смиренномудренно святыню часа сего разумевая, сице рекла еси: се раба Господня, буди мне по глаголу Твоему. Пречистая Дево, научи и нас хранити покорность воли Божией и безропотно переносити Богом ниспосылаемыя нам испытания, да очистятся огнем страданий души наша, да изметутся из сердец наших вся скверны грехов наших, да востанем бодры и чисти сердцем, благодарственное хваление сице Богу возсылая: Благодарим Тебе, Боже, Царю небесе и земли, вся премудростию Твоею строяй и сокровенная человеков яве предведый, се достойная по делом нашим приемлем, да будет над нами воля святая Твоя! Тебе же, Преблагословенная Дево, Бога всех рождшая, умиленно прославляем: Радуйся, смиренная раба Господня, нас примером Своим ободряющая: радуйся, Дево Пречитая, юность Свою Богу постившая. Радуйся, Кротость неизлаголанная: радуйся, Столп веры непоколебимый. Радуйся, Упование всех концев земли: радуйся, любве море неизмеримое. Радуйся, Светлая Обителе, странников бездомных.

Кондак 5
Боготечная звезда, волхвом на небеси являющаяся и дивный вертеп озарившая показа Царя Славы, в яслех лежаща, с Ним Матерь Его, Деву Чистую и Святую, в сердце Своем песни ангелов слагавшую. О, Дево кротости и смирения! Вознеси Господу и наше славословие: Аллилуиа.

Икос 5
Видяще волхвы славу предвечнаго Младенца Христа, нас ради плотию рождшагося, воздаша Ему божеское поклонение: ангел же Господень, старцу Иосифу явився, повеле безсмертное Отроча и Матерь Его во Египет от ярости Иродовой спасати. Со умилением помышляя о пути Твоем, Богородице, многотруднем, мы грешнии смиренно к Тебе прибегаем: облегчи и наш путь тернии сполненный, подними падающих духом, поддержи слабых и болящих, простри руку спасения унывающим, отри слезы плачущим, соедини растоящаяся сердца скорбящих, возврати матери ея сына, возврати брату брата, возврати нам отчизну нашу, кровию истекающую, возврати нам храмы святыя, села наши родныя: возврати нам Русь православную, тысячами всечей и лампад к Богу свои молитвы, яко фимиам, возносящую. О, Преславная, Всепетая Богородице, во вся прежняя дни горестей наших милотивно на нас призиравшая, буди милостива и ныне к нам странникам, по земли родной плачущим, умоли Сына Твоего возвратити нам Свою милость, а отчизне нашей отшедшую ея славу, да радостно во умилении сердец наших Тебе вопием: Радуйся, Богородице, материнския слезы собирающая: радуйся, вдовиц и сирот покрывающая. Радуйся, старцев утешение: радуйся, юности ободрение. Радуйся, убогих призрение: радуйся. Всему миру веселие. Радуйся, Светлая Обителе, странников бездомных.

Кондак 6
Проповедь любве, кротости и всепрощения мирови возвещающи, со Христом Сыном Твоим вся горести земныя претерпевшая, апостола Иоанна и с ним весь род христианский Своему материнскому сердцу усыновившая, Приснодево Пренепорочная! Не отвержи и нас во тьме изгнания сущих и утешения материнского требующих, да со благодарением Господу зовем: Аллилуиа.

Икос 6
Возсиявшая всей вселенней, яко дивный храм Божий, исполненный божественныя славы и благодати, о Дево Мариа Пречистая, Царице Небесная, Царице человеков и ангелов, апостолов и мучеников! Возсияй и нам путеводной звездой во мраке скорбных дней наших, возвесели сердца наша, во уныние поверженныя, просвети умы наша, тьмою отчаяния объятыя, возстави силы наша, на чужбине изсякающия, умножи веру нашу, укрепи надежду нашу и согрей огнем пламенныя любве ожесточенныя и озлобленныя души наша, да зряще Тя, на небесех нам внемлющуя, молитвенно Тебе зовем: Радуйся, Мати рода христианского: радуйся, паче всех светил миру сияющая. Радуйся, всех добродетелей златый Венец: радуйся, Едина благословенная, скорбный наш мир в печали посещающая. Радуйся, Светлая Обителе, странников бездомных.

Кондак 7
Хотящи с Сыном Твоим Единородным до смерти крестной неразлучна быти, Ты воспоследовала еси невинному Страдальцу до самыя голгофы, и у подножия креста, слышащи вопли сонмища разьяренного, в молчании страдала еси, и Тебе Самой душу пройде оружие. Темже, удивляяся Твоему неизреченному матернему мужеству, зовем: Аллилуиа.

Икос 7
Новую весть ангел Господень Тебе, Богородице, возвести, воскресшаго Сына Твоего радостно прославляя: с Ним и вся воинства небесная велегласно славят безсмертнаго Христа. Сподоби и нас, Христе Боже, ад сокрушивый и живот вечный мирови даровавый, срадоватися днесь Матери Твоей, умиленно восклицая: Радуйся, благодатная, Господь с Тобою: радуйся, чистая Дево, слава бо Госпдня на Тебе возсия. Радуйся, Богородице, о востании рождества Твоего: радуйся, незаходимая заре истины, и наше земное странствование освещающая. Радуйся, путеводная звездо, нас к правде Божией ведущая: радуйся, луч райский, наша души умиротворяющий. Радуйся, Светлая Обителе, странников бездомных.

Кондак 8
Странное таинство и преславное вознесением Твоим, Христе Боже, миру явивый и одесную Бога Отца седый! И нам странником земли, о селениях райских скорбящим Утешителя, Духа Истины ниспосли, и вселися в ны, Жинодавче, молитвами Матере Твоея, да зовем: Аллилуиа.

Икос 8
Весь наш путь страннический, слезами горести орошенный, камней и терний исполненный, к Тебе, Богородице, вопиет: умилосердися над нами Божественная наша Покровительнице, и приими под сень святаго покрова Твоего нас, странников, от пути непосильнаго изнемогающих и успокоения в тихой пристани чающих: укрепи старцев немощных, уврачуй стариц болящих, насыти нас алчущих, напой нас жаждущих, воодушеви юношей, к светлым подвигам стремящихся, вразуми родителей к воспитанию детей своих, сохрани младенцев от всякия беды, укрепи в Христовой правде мужей и воинов, осени благодатию наших пастырей духовных, вознеси молитвы наши к престолу Всевышняго, да славословим Тя Матерь Божию: Радуйся, путников светлое пристанище: радуйся, скорбящих святая радость. Радуйся, младенцев покров и защита: радуйся, материнский сосуд милосердия. Радуйся, правды небесныя Поборнице: радуйся, непрестанная Ходатаица о душах наших. Радуйся, Светлая Обителе, странников бездомных.

Кондак 9
Всяк, иже призовет имя Господне, спасется, и на всяку плоть излию от Духа Моего, рече Господь. На Тебе же, Мати Божия, благодать Духа излияся превыше всякия меры, зане Творца и Зиждителя нашего вместила еси. Излей же и на наши страждущия души милость Сына Твоего, да облегченным сердцем вопием: Аллилуиа.

Икос 9
Витии боговещаннии апостоли, ничтоже земное в себе помышляя, со благоговейным трепетом преславное успение Твое славят: Царь бо царствующих и Господь, господствующих, сошед на землю, восприя душу святую Твою и в велицей славе вознесе Ю на небо, идеже уготова одесную престола Своего обитель Тебе. И мы, яко овцы разсеяннии, ко Твоему милосердию Богородице, взываем: подаждь пристанище нам бездомным, собери во едино южичества наша, примири враждующих, утиши мятущияся души наша, посли нам мир и благоволение, да песнь молитвенно Тебе поем: Радуйся, нас погибающих спасающая: радуйся, с лики святых за ны молящаяся. Радуйся, божественный покров рабом Твоим: радуйся, светлый лик от нас не отвращающая. Радуйся, во успении мир не оставляющая: радуйся, за ны пред Сыном Твоим предстательствующая. Радуйся, Светлая Обителе, странников бездомных.

Кондак 10
Спасти хотяй мир, Пастырю Добрый, всех ко спасению зовущий и вся к Себе привлекающий, праведныя любяй и грешныя милуяй: спаси и нас грешных молитвами Богородицы, да поем Ти: Аллилуиа.

Икос 10
Стена и предстательство всех грешников кающихся! Приими и наше покаяние Всеблагая Дево Марие: умягчи жестосердие душ наших, исцели болезненное блуждание умов наших, низвергни гордых в пучину смирения, подыми горе очи наши, землею окованныя, разомкни уста, в отчаянии сомкнувшиися, да воспоем Ти славословие: Радуйся, живоносный Источниче, нас росою живительною окропляющий: радуйся, во вся роды гласу молящихся внемлющая. Радуйся, погибающим руку спасения простирающая: радуйся, Всеблагая, о злобе людстей страждущая. Радуйся, Светлая Обителе, странников бездомных.

Кондак 11
Пение ангельское провождает праведных по смерти: где убо мы грешнии обрящем спасение, егда кроме единаго благаго дела, пред Судией Праведным предстанем; На Тя, Богородице, наша едина надежда: спаси Твоим предстательством души наша, да поем: Аллилуиа.

Икос 11
Светоприемная Свеща, во тьме изгнания нам светящая! Веди нас к сыну Твоему, Господу и Спасителю нашему, и якоже на браке в Кане Галилейстей заступающеюся за бедных людей показалася еси, глаголющи Сыну Твоему: "вина не имут", такожде и ныне покажися Заступницей за нас отверженных, рцы Сыну Твоему: "Господи, отчизны и пристанища не имут, исполни сердца их радости и утешения". Мы же благодарне Тебе, Владычище, восклищаем: Радуйся, Свет небесный неугасимый: радуйся, одесную Бога Сына Твоего сидящая. Радуйся, сил небесных Превышшая: радуйся, простых умов утверждение. Радуйся, вечное стремление праведных: радуйся, возводящая грешников на небо. Радуйся, Светлая Обителе, странников бездомных.

Кондак 12
Благодать Сына Твоего мирови явила еси, Приснодево Пренепорочная. Спаси и нас грешных, зовущих о Тебе: Аллилуиа.

Икос 12
Поюще Тя, Благодатная, между женами Благословенная, Спасителя миру даровавшая и тем вечную славу и поклонение Себе стяжавшая, радостное Ти, Божия Матерь, славословие приносим: Радуйся, из Тебе бо возсия Солнце Правды Христос: радуйся, непостижимая Тайна Боговоплощения. Радуйся, Невместимаго вместившая: радуйся, Мати Света во тьме Светящаго, и тьма Его не объят. Радуйся, Мати Слова, еже бе к Богу: радуйся, Мати Слова, иже бе Бог. Радуйся, Светлая Обителе, странников бездомных.

Кондак 13
О, Всепетая Мати! О, Мати благодати исполненная! Приими наше слезное к Тебе моление, еже в нынешнее время, на милосердие Твое дерзающе, из глубины душевныя Тебе приносим, поюще: Аллилуиа.

(Таже чтем 1-й Икос и поем 1-й Кондак)

Молитва ко Пресвятей Богородице Светлей Обители странников бездомных
Что Ти речем, Царице наша и Владычице, помышления проницающая, и всю нашу жизнь во мгновение ока озирающая; что можем мы, грешнии и нечистии, поведати своими скверными устнами Тебе, Пречистей и Пренепорочней; Не имамы словес по достоянию воспети Твое величие у престола Творца всея вселенныя, не имамы силы исчести вся дела Твоя милосердная, человеков ради соделанная. Предстоим Тебе трепещущии и плочущии, о всей греховней жизни нашей помышляющии. Вемы, яко по делом кару Божию приемлем, вемы, яко недостойны под светлую сень покрова Твоего внити: но яко мытарь, яко разбойник, яко слепцы и прокаженнии, и мы сокрушенным сердцем горестно Господу взываем: Боже, милостив буди нам грешным! И Тебе, Пречистая Дево, молим: приими вопль и стоны сердец наших и вознеси их к престолу Всевышнего, поведай Сыну Твоему слезное покаяние и печаль сердец наших: да воззрит на нас милосердным оком и дарует нам исполнение молитв наших. Собери нас, якоже матерь собирает птенцы под криле своя, и настави нас на путь спасения. Умири, утверди и благослови страну нашу и первосвятителя ея, а с ним вся священнослужители и верныя слуги Церкви Христовой. Вразуми начальствующих, да исполнят должную пред Богом и человеки правду, соблюдая добрая и сокрушая зло. Помози отцам и матерем наставити чада своя. Вразуми чад, да чтут родителей и нставников своих. Отврати сердца наша от греха и зажги среди нас огонь святаго милосердия Твоего: да возненавидим зло, да узрим бездну падения нашего и возлюбим ближняго своего, да отвержемся себе, да возьмем крест свой и пойдем к свету истины, просвещающей мир. Сокруши силу зла на земли и пролей в наши умы луч разума Христова, да Тобою спасаеми, зде отечество, а по смерти рай обрящем, и триединому Богу хвалу, благодарение и поклонение возсылаем всегда, ныне и присно, и во веки веков. Аминь.

Примечание: Текст печатается с анонимного издания, предположительно вышедшего на Пряшевской Руси в 1930-е годы. В редакторской сноске сказано: "Сей акафист в рукописи распространяется среди русских беженцев. В надежде, что приближается время помилования и в сознании, что теперь особенно нужно усилить молитву за бедствующих, редакция решила сделать сей акафист, через напечатание его, общедоступным каждому русскому для домашнего молитвенного употребления".

Copyright © Колупаев В.Е. "Русские в Северной Африке", 2004. All rights reserved. Для связи: rostigumen@mtu-net.ru
 






Copyright © 2001-2007, Pagez, hosted by orthodoxy.ru
Православное книжное обозрение